​തിരുവനന്തപുരം: ലഹരി എന്ന വിപത്തിനെ നാടുകടത്താൻ കുട്ടികൾ സ്വയം സന്നദ്ധപ്രവർത്തകരായി മുന്നോട്ടുവരണമെന്ന് മുഖ്യമന്ത്രി വി.ഡി. സതീശൻ. രാജ്യാന്തര മയക്കുമരുന്ന് വിരുദ്ധ ദിനത്തോടനുബന്ധിച്ച് എക്സൈസ് വകുപ്പും വിശ്വശാന്തി ഡെവലപ്‌മെന്റ് ഫൗണ്ടേഷനും സംയുക്തമായി കവടിയാറിൽ സംഘടിപ്പിച്ച ബോധവത്കരണ റാലി ഫ്ലാഗ് ഓഫ് ചെയ്ത് സംസാരിക്കുകയായിരുന്നു അദ്ദേഹം.
​"ലഹരി ഉപയോഗം തകർക്കുന്നത് വ്യക്തിയെ മാത്രമല്ല, ഒരു കുടുംബത്തെയും സമൂഹത്തെയുമാണ്. കുട്ടികൾ മാതാപിതാക്കളുടെ മാത്രമല്ല, ഈ നാടിന്റെയാകെ പ്രതീക്ഷയാണ്." - മുഖ്യമന്ത്രി വി.ഡി. സതീശൻ
​ലഹരി മാഫിയയെ പൂർണ്ണമായും ഇല്ലാതാക്കാൻ സർക്കാർ ശക്തമായ നടപടികളുമായി മുന്നോട്ട് പോകുമെന്നും മുഖ്യമന്ത്രി വ്യക്തമാക്കി. കവടിയാറിൽ നിന്ന് കനകക്കുന്ന് കൊട്ടാരം വരെ നടന്ന റാലിയിൽ കൂട്ടയോട്ടം, ബൈക്ക്-സൈക്കിൾ റാലികൾ, റോളർ സ്കേറ്റിങ് എന്നിവ അരങ്ങേറി.
​വരുന്നു 'മയങ്ങില്ല കേരളം' ജനജാഗ്രതാ പോർട്ടൽ
​അന്താരാഷ്ട്ര ലഹരി ശൃംഖലകളെ തകർക്കാൻ സംസ്ഥാനത്ത് സ്റ്റേറ്റ് നാർക്കോട്ടിക് കൺട്രോൾ ബ്യൂറോ രൂപീകരിക്കുമെന്ന് എക്സൈസ് മന്ത്രി എം. ലിജു അറിയിച്ചു. ഇതിനൊപ്പം ദീർഘകാലാടിസ്ഥാനത്തിലുള്ള പ്രതിരോധ പ്രവർത്തനങ്ങൾക്കായി 'മയങ്ങില്ല കേരളം' എന്ന പദ്ധതിയും നടപ്പിലാക്കും.
​പദ്ധതിയുടെ ഭാഗമായി പൊതുജനങ്ങൾക്ക് ലഹരി ഇടപാടുകളെക്കുറിച്ചുള്ള വിവരങ്ങൾ രഹസ്യമായി പങ്കുവെക്കാൻ സഹായിക്കുന്ന ജനജാഗ്രതാ പോർട്ടലും മൊബൈൽ ആപ്ലിക്കേഷനും ജൂലൈ ഒന്നിന് പ്രവർത്തനസജ്ജമാകും. ലഹരിവിരുദ്ധ പ്രവർത്തനങ്ങളെ സമഗ്രമായി ഏകോപിപ്പിക്കുന്ന ഇന്ത്യയിലെ ആദ്യത്തെ ഡിജിറ്റൽ സംരംഭമായിരിക്കും ഇതെന്നും മന്ത്രി വാർത്താസമ്മേളനത്തിൽ പറഞ്ഞു.
​എക്സൈസ് വകുപ്പിൽ വൻ പരിഷ്കാരങ്ങൾ
​ലഹരിവേട്ട ശക്തമാക്കുന്നതിനായി സർക്കാർ നടപ്പിലാക്കും.
​താലൂക്കുകളിൽ ഡി-അഡിക്ഷൻ സെന്ററുകൾ: എക്സൈസ് വകുപ്പിന്റെ നേതൃത്വത്തിൽ എല്ലാ താലൂക്കുകളിലും വിപുലമായ ഡി-അഡിക്ഷൻ സെന്ററുകൾ സ്ഥാപിക്കും. എൻഫോഴ്സ്മെന്റിന് പുറമെ ബോധവത്കരണത്തിനും പുനരധിവാസത്തിനുമാണ് മുൻഗണന.
​എക്സൈസ് നവീകരണം: ആധുനിക ആയുധങ്ങളുടെയും വാഹനങ്ങളുടെയും കുറവ് നികത്തി എക്സൈസ് ഓഫീസുകളെ 'മോഡൽ എക്സൈസ് ഓഫീസുകളായി' മാറ്റും.
​ഓപ്പറേഷൻ തണ്ടർ: നിലവിൽ ലഹരി പരിശോധനകൾക്കായി നടന്നു വരുന്ന 'തൂഫാൻ', 'തണ്ടർ' എന്നീ ഓപ്പറേഷനുകളിലൂടെ 14,700-ലധികം കേസുകൾ രജിസ്റ്റർ ചെയ്തിട്ടുണ്ട്. വ്യാജകള്ള് കണ്ടെത്താനായി 'ഓപ്പറേഷൻ ശുദ്ധി' എന്ന പേരിൽ പ്രത്യേക പരിശോധനയും ഉടൻ ആരംഭിക്കും.
​കവടിയാറിൽ നടന്ന ചടങ്ങുകളിലും വാർത്താസമ്മേളനത്തിലും എക്സൈസ് കമ്മീഷണർ  സാംബശിവ റാവു, കൗൺസിലർ ശബരീനാഥൻ കെ.എസ്, വിശ്വശാന്തി ഡെവലപ്‌മെന്റ് ഫൗണ്ടേഷൻ മാനേജിങ് ഡയറക്ടർ മേജർ രവി തുടങ്ങിയ പ്രമുഖർ പങ്കെടുത്തു.